Hamecoming Scotland
The Hamecoming Scotland 2009 program sterts aff formal-like on the weekend o Robert Burns' 250t anniversar (Januar 24t-25t) wi baith new an tradeetional daeings sib tae Burns set tae gae aheid in steids the braid o Scotland. At the same time in Glesca, Celtic Connections, Scotland's biggest wunter music fest, will ootset the skeel o namely performers o modren day that haes Burns as thair musical springheid.
Gauin intae the ware, Mey is whisky month wi an open inveet tae come tae the Hame o Whisky for tae reenge an apprise the skeel o thae eydent stillsmen an maister blanders that haes creatit ane o Scotland's biggest exports an a kenspeckle pairt o her culture. Stertin aff the festivities at the biggest ever Speerit o Speyside Fest (1st-10t Mey), the Scotch Whisky Industry will open its doors tae baith veesitors an hame-aboot fowk. Fae rare days oot at distilleries, whisky tasters an awa-fae-hame whisky clesses, the'll be sindry weys tae pree Scotland's national swallae.
Ower the simmer months Hamecoming Scotland 2009 will present muckle warld-kent gaitherings an shaws that's either split-new or haes been eikit tae. Creatit aince-eeran for the Hamecoming year, The Gaithering (July 25-26) will mark the weys that the Scots clans haes haen a haun in the makkin o the history an culture o the warld. Twa days o Heilan Gemms in Embra's Halyruid Park will be attendit bi a wheen o skeely pipers, dancers an the warld's foremaist Heilan athletes. The'll be a Historic Clan pageant tae ferlie at aneath the auncient ramparts o Embra Castle forby. This will be ane o the mucklest Clan Gaitherings ever held on the syle o Scotland. The'r an ettle that Hamecoming will hae a haun in throu-pit at a wheen o warld-kent gaitherings sic as The Embra Wapponshaw (Aug 7-30) an The Open Gowf Championship (July 16-18), a championship that wins back tae the Hame o Gowf in 2009 an the Ailsae Championship course, Turnberry.
In the Heilans in October, the'r plans tae estaiblish a fortnicht lang fest for tae celebrate the best o tradeetional Heilan Culture. This will be biggit aroon a muckle gaithering anent the Diaspora an gien uphaud fae sindry kinds o throu-pit gauin on in aw the airts o the Heilans.
At the hinneren, aboot Saunt Andra's day, Hamecoming Scotland will feenish the year wi a muckle sangshaw drawn fae baith tradeetional Scots fowk heroes an the maist novative o modren-day Scots baunds that's makkin thair mark aroon the warld the day.